Followers

Powered By Blogger

Popular Posts

Sunday, May 13, 2007

الله يحرقك ياحسين

الله يحرقك ياحسين انت وامك بصراحه خنقتوني
صحيت الصبح وكلي سعادة نايمة كويس ومزقططة وقلت انزل اروح الشغل وقلت تاكسي بقي بسرعة اتأخرت علي صاحبتي المهم لقيت تاكسي قولتله المترو قاللي ماشي ركبت ومفيش خطوتين والا وواحدة وقفته وسألته مدرسه النقراشي الابتدائي قالها ماشي وانا مستعجله راحت ركبت ولقيتها بتنده ياحسين يلا ياواد اركب بسرعة ولقيت حسين بيركب وجنبه امه اللي كتيييييييييييييييييييييرة اوي حسيت انهم قعدوا عليا وبعد حبه قالت للسواق نزلني هنا وبعد كده نزل حسين عند المدرسه اصل حسين عند امتحان وخايف لاحسن ميردوش يدخلوه كل ده والتاكسي واقف وحسين بيأوأ وانا اتخنقت روح ياحسين وحسين يقول لا يمااااااااااامااااااااااااااا انا خايف وانا عاوزة ارميهم الاتنين من التاكسي حسيت اني راكبه ميكروباص المهم علي ما قررت هتعمل ايه كان السواق اتخنق قالها يلا ياستي قالتله طب ثواني انزل الشنطة دي عند ام سيد وعلي ما البرميل اتحرك كنت انا مت من الخنقة ومن الزنقة ونزلت لقيت ابو سيد فاتح محل عصير قصب اسيب الشنطة دي فين ليه رايحة لاخر الشارع سيبيها ورا البنك والا اقولك ورا الثلاجه والسواق يستعجلها وهيه برود الدنيا بس ركبت وبعد حوالي 10 خطوات قالتله بس المدرسه اهي كنت هنفجر فيها وخدتلها كاك دقيق علي ماحموله الاسمنت تنزل والحمد لله وصلت لصاحبتي وركبنا وروحنا الشغل
إلهي مايوقع في طريقكوا حد زييهم ويحرق حسين وامه

Sunday, May 6, 2007


لحظة هروب الموت العتمة قتلت اوقاتي ...طرح الاسي مبدور والهم كاتم صوتي ....الغيوم اتكتفت علي الحلم خنقت اطرافه ..... والهموم اتستفت حمل علي حمل اكتافه....ومات الحلم شهيد ..ومكملش لا حد سمعه ولا حد شافه
في لحظة هروب النور ......
يئست ييجي يوم......ويوم ماييجي هييجي والموت راكبه...لبست التوب توب الفارس المهزوم اللي الهوي غرقله كل مراكبه ...قلت فرصه تانية ياحياه ....هاعمل مركبة من ورق.....او الاقي طوق نجاة....بس المصير برضه غرق...وسلمت امري للي جاي واستنيت اليوم يفوت....واتمنيت اشوف الضي قبل ما اسافر .. واموت... وبرضه مجاش الضي .. واستسلمت في هدوء واستنيت وانا ساكتة ومحتاجة وكل حاجة محتاجة ..تكون شابة..والقمر عطشان محبة والحنين محتاج لغربة عشان احس بقوته...والملل محتاج لدبة تموته...والامل محتاج لحبة عشان تنبت زرعته ...الكل عطشان والحرف علي الورق بيتخنق....الكل محتاج الميه تشق الطريق للريق....
اما انا ففي انتظار الموت مجئ للصديق..والمصيبة اني معرفلوش طريق عشان اروح له قبل ما يجي...اصل الانتظار مر....الانتظار....كلمة مخيفة بتعذبني...وبدقة خفيفة عجيبة..دق الباب بحنان...قلبي انتفض واتخض...اصل الموت مفيش بعده ...اتوارب الباب وقف النبض وعد ومين يهرب من وعده ...غمضت عيني قلتله متسبلين جاهزين وانا مستعدة ....وابتدي الخوف يدب في اطرافي وانا حافية في عز برودة ايامي والكفن جاهز مش عايز غير ان البدن يتمد....وابتدت الرعشة وابتدي العد ...ومفيش حد ينجدني ...قلتله مارس دورك ومددني ..كل ده وهو ساكت وانا عنيا متسبلة ..قلتله ماتسكتش ده وعد ومتحدد..
فجأة..لمسني ..وحان الوقت..لكن..غريبة..دي مش لمسته ..الموت مش حنين مش رقيق عفيف في جسته..قاللي فتحي عنيكي..برضه غريبه ..دي مش نبراته...انا مادقتش الموت بس دي مش نبراته ..الموت مش عالي الصوت..مش جميل الصوت مش صريح في عباراته...ايه الحكاية..فتحت عنيا واول ما شفته غرقت فيه..كيان مليان حنيه يمكن عرفته من عنيه..مش ممكن مستحيل..حلمي الجميل اللي مات..او اللي كنت فاكراه مات...حلمي اللي مااتولدش ...انت جاي منين..قاللي جاي من زمان من سنين قابلت موتك موته وجيت..معقولة لما اغيب ثواني اجي الاقيك...فعلا مهما قلبك لف ودار ولو قست مليون توب ..توب واحد بس مقاسي هو اهلي وناسي هو مالي...ضحكت من قلبي ضحكة خرجت فيها كل غلبي اللي فات..ضحكة خرجت فيها اوصاف حلمي اللي مات :-
اوصفهولك......... حلم جميل كبير حنين رقيق فوق الوصف علي ادي معمول عشاني ..
الشكل حبة ..والاسم.....

Thursday, May 3, 2007

لما النسيم

قعدت معايا صاحبتي وحكتلي علي كل اللي جواها قالتلي انه سألها بتحبيني معرفتش ترد عليه كان نفسها تقوله انها بتموت فيه كمان مش بتحبه بس قولتلها وبعدين قالتلي انا كان نفسي اقوله اني بدات احس اني بعيش بجد معاه حست معاه بالامان والسعاده قولتلها بس ده جنون قالتلي احلي ما في الحب جنونه انتي مش فاهمة لانك مش حاسه احساسي وكمان متعرفيهوش زيي وكمان مش بتشوفيه بعنيا زيي هو كل شئ في حياتي بس عارفه المهم مش ده كله المهم اني عمري ماهزعل منه ابدا محدش بيزعل من روحه من نفسه حتي لو قعدت مستنياه 6 سنين مش 6 ساعات بس المهم انه قدر يمتص غضبي بكل حنيه عارفني حافظني فاهمني بيقراني يعني من غير ما اقوله هو عارف اني بحبه وقالتلي ياسلام عليه بقي لما هداني اغنية لما النسيم لمحمد منير وكانت مفاجاة ليا كمان انه قالي انه بيحبني ياااااااااااااااااااااااه علي الدنيا لما في لحظه تبقي هو وبس كان نفسي اقوله وانا كمان بس اتكهربت الكلمه زلزلتني هزتني مسكت نفسي بالعافية اني احط راسي علي صدره وانسي واخبي كل شئ في حضنه بس كمان جابلي فل ياسلام طرت من السعاده وانا مروحه البيت كنت مش لمسه الارض برجلي كنت طايرة في السما انا بحبه اوي اوي قولتلها بس بس بس بس بس بس بس
خنقتيني كفايه انا غلبت معاكي نصح وانتي ولا انتي هنا
بصتلي بقرف وقالتلي
انتي عمرك ماهتفهمي اللي بيني وبينه ده حلمي اللي لقيته خليكي مفروسه مني اني لقيته
قومت وسيبتها تتكلم ومن جوايا فرحانه ليها بس تعبيراتي مقتضبة
لا تعليق