ليلة العيد كانت ليلة ولا كانت علي بالي اصلا عادي كنت في البيت وفجأة طقت في دماغي انزل اشتري لبس وفي ثواني اتشلقبت ونزلت وانا في السكه كلمت صاحبتي وقررنا نتقابل بعد ما هيه تعمل شويه مشاوير كده ونزلت الاول اشتري برفان لان النوع اللي بستعمله لازم اركبه من عند حد معينوبعد كده نزلت شارع فؤاد ودخلت محل فري لاين لاني بحبه وانا ماسكه جاكيت شيك كلمتني صديقتي سبت اللي في ايديا وطرت علي هارديز اللي في التحرير وانا واقفه لقيت شخص كان معايا في الجامعة سلم عليا وفضل واقف طبعا عشان يطمن اني واقفه في المكان ده مستنيه بنت مش.... وفعلا جت صاحبتي ومشينا دخلنا شارع قصر النيل ولاني مش متردده فاللي بيعجبني بشتريه طالما جه مقاسي وفعلا جبت بلوزة وجاكيت شكلهم امور كده وخرجنا قعدنا علي كافيه كده قدام فندق اكتشفته من المره اللي فاتت انه فندق مشهور وقعدنا نرغي ونتكلم وفجأة قالتلي انا جعانه قلت اوك ناكل سوا وافتكرت اني عاوزة حزام مشينا للناصيه واشترينا واحد بعد كده كوك دور والا دار القمر ولاني مكلتش من دار القمر قبل كده وافقت واكلنا بيتزا ومناقيش لبنه وخضروات رجعتني بالماضي 6 نسين ايام الاردن واتبسطنا اوي وبعد كده مشينا للمترو ونزلنا اتجهت وصديقتي الي اتجاه حلوان ومنه انا دخلت علي اتجاه المرج ازاي معرفش ووقفت علي الرصيف الناحية التانيه اطلع لساني لصديقتي واللي فرحني ان المترو بتاعي جه الاول وسبتها علي المحطه
كانت ليله جميله بعيدا عن انها ليلة عيد ولكن لاننا كنا سوا وقضينا وقت ممتع
كل سنه وانتم طيبين
3 comments:
كل سنة وحضرتك بالف صحة وسلامة
عيد سعيد
عزيزتى ماسة
وليه صديقك عايز يطمن ؟ كان فيه ايه قبل كده ؟
وانت بالصحة والسلامة وربنا يخللى ايامك كلها اعياد
لانى صعيدى فهاسالك هوا ينفع البنات تخرج باليل ..........عمورة اللعيب
Post a Comment