ياالله متي نكبر

ألا يا طفل لا تكبر .......كذا اجمل .......كذا أطهر ... كذا لادين يتراكم كذا لا ضغط ولا سكر تري اكبر كذبة عشناها

((ياالله متي نكبر))

احلم اد ما تقدر خبي احلامك بدفتر

تري الايام تسرقها

والاحلام تتبخر

تفتكروا

معرفش ليه جه علي بالي صورة العيد وافتكرت كمان اغنية قديمة لطفلة كان صوتها حلو ولو انه كان بيصرخ كانت بتقول : ياخسارة ياخسارة يابابا ياخسارة ع الدنيا يابابا مبقاش فيه نشرة اخبار الا بصوت طلقات النار والمح طفل صغير لكن مش بيغني طفل في سني وضحكته تاهت منه ومني كان ذنبه ايه معرفش وده كله ليه مولود والحزن بيتكلم جوه عيونه والخوف من العالم غير شكله ولونه والفرحة اللي اتمناها يلقاها في عيون اصحابه مرارة ياخسارة

ارجوكوا كفاية سيبوا الطفل يعيش متزعلونيش والا انتوا خلاص مبتسمعونيش هصرخ هتكلم وهنادي بالسلام واقول خلوا الطفل يعيش مش هقدر اضحك ولا العب وانا صاحبي غرقان في دموعه لكن مش هسكت تاني الا وكل الناس سمعاني مش هقدر اعيد والبس فستاني وانا شايفه هناك طفل صغير لسه معيدتش

دلوقتي قال بيعيبوا علي ابو تريكة وبيقولوا عليه ارهابيمع ان في كاس العالم واحد من غانا رفع علم اسرائيل مع ان غانا ملهاش علاقة لا بفلسطين ولا الخنازير ودلوقتي بيدوا انذار لابو تريكة ضحكة مصر وحلواني مصر وفكهاني مصر وأأدب لعيب في مصر ولاني عارفاه كويس لانه دفعتي في الكلية ابو تريكة عمره ما اتغير هو هو من ايام الترسانه وحتي في الاهلي متغيرش بل بالعكس اللي زاده عشق الناس ليه

تفتكروا اللي حصل هيخلي شعبية ابو تريكة تقل بالطبع نوووووووووووووو

مطر قلبي

ما اجمل المطر انا بحب الشتا اوي

يمكن عشان انا من مواليد الشتا والناس دول بيبقوا رومانسيين اوي

الشتا بالنسبة ليا حب دفا رومانسية عقل رزانه عند

انا سعيده اوي بالجو ده وافتكرت ماجدة الرومي وهيه بتقول

هواياتي صغيرة واهتماماتي صغيرة وطموحي ان امشي ساعات معك تحت المطر

بس انا نفسي اعمل كده في اسكندرية الجو هناك مشتقاله جدا بس للاسف ظروفي متسمحش اسافر اليومين دول لظروف الشغل بس بحلم اني هناك مستمتعة ولاني محرومة من مطر اسكندرية حاسة قلبي بيمطر بس دفيان معوض شوية برد الليالي

ما اجملها

ما اجملها حياتي الآن كل ما فيها جميل استمتع بكل لحظة فيها

عارفين اجمل شئ لما تلاقوا حد واخد باله منك في كل شئ يهتم بيك يودك كده ويعرف انت بتحب ايه ويجيبه ليك ياه والله كأن الواحد راح عالم تاني ودنيا تانيه مفيهاش ناس وحشين يارب كل الناس تبقي زيي وتعيش اجمل ايامها بقي والله احنا محتاجين ده اوي

متشكرة اوي

انا بشكر بجد كل الناس اللي جت كتب كتابي واللي مجاش هو الخسران

بس والله من قلبي مبسوطة ان كمية الناس دي كلها جت عشاني

واحب اقول اسمائهم : شريف / هبة وائل /احمد عبد الوهاب/منير محمود/محمود فائق وزوجته وابنه/ووائل وزوجته وولاده/مني محمود /وليد/عمرو رشاد/اللوا شرف/استاذ صالح/احمد حسن/محمد حسن/محمود مبارك/مي وبنتها/نشأت وزوجته وابنته/مرات محمد الشاهد الله يرحمه وخديجة ويوسف وحبيبة /محمد طلبه / هبه/زكريا وزوجته وابنه/عم صبحي/عاليا /هبه عادل/هند فاروق/رضوي/مني جهلان/رحاب زكي/ياسمينا/هناء ومعاذ/اسراء فيصل/هبه سحلكة/احمد حسين /احمد شرف/محمد صلاح/محمد راشد/علاء الجرايحي/احمد حسان/عماد عادل/استاذ قدري/مدام سهير وزوجها/مدام شادية/حازم/ولاء مازن/منار/هاله عزمي/سوسن/نهي احمد/عمرو زهران/ميريهان/ميادة/صفوت/بسنت/كاريمان/رغده/ريكا/اسراء عبد الخالق/نشوي/طارق عرفة/غادة ذكي

ده طبعا الي جانب قرايبي وجيراني وصحاب اخويا واختي وجوزها وابنها وباسم وسماح ومامتها ودعاء وعماد وصحاب ماما يعني الحمد لله

المهم بعد الكتاب اليوم كان جامد موت اتصورنا وهيصنا وسهرنا اليوم كان كلاسيكي جدا ودود ودافي

الحمد لله

وعقبال كل اصحابي

كل سنة وانا طيبة

كل سنة وانا طيبة

النهاردة عيد ميلادي

بس السنة دي عيد ميلادي مش عادي

ده عيد ميلادي الثلاثين

وكمان بعد يومين كتب كتابي

يعني الحياة معايا كويسه

والاجمد كمان ان الدنيا تلج

وانا بحب الشتا جدا الحمد لله كل الامور كويسه

ويارب تبقي سنه سعيده علي كل اصحابي وصحباتي يارب وكل اللي بيتمني شئ يتحقق

يوم مزحلق ما أحلاك

اد ايه اليوم امبارح كان جميل اولا لانه كان اجازة يعني الشوارع فاضيه موت لاني مخدتش اجازة امبارح والدنيا فاضية وسقعة رحت الشغل خلصت كل الشغل اللي كان متأخر وانجزت الشغل اللي كان عاوز روقان بال وشغل في هدوء بدون دوشه ولا موظفين ولا ساعي ولا مديرين والاسانسيرات فاضية والدنيا حلوة قلت يابت انزلي بقي هاتي جزمة الفرح استغلي ان محدش نازل من بيته نزلت رمسيس اللي اول اشوفه فاضي الناس اللي ماشيين فيه ميكملوش 50 بني ادم المهم نزلت المهندسين وقابلت ميسا صاحبتي اللي هتسافر يوم 16/1 اللي هو هو عيد ميلادي ومش هتحضر كمان كتب كتابي اللي هو 18/1 شفته بقي انا زعلانه اوي لاني بحبها جدا ومش متخيله انها مش تيجي كتب كتابي المهم اتقابلنا ولانها تعبانه اليومين دول الدكتور منعها انها تتكلم لمده يومين ولو حبت تتكلم يبقي همسا بالشفايف بس اتفرجنا علي المحلات وهوباااااااا المطر ابتدي يا بنتي نروح قالتلي لا نكمل قعدنا نلف وفي الاخر مش عجبني ولا جزمة لقيت نفسي بشتري بالطو صوف وجاكيت قطيفة مضلع ازاي معرفش بس الاجمل ان التمشية تحت المطر خصوصا مع الناس اللي بنحبهم بتبقي جامده انا وهي محسناش ان الدنيا سقعة ولا ان الشوارع مليانه مية بس الشوارع برضه فاضيه وكنا بنتكلم ونضحك همسا اصل الصداقة دي هدية ربنا للانسان لو هو كويس هيبعتله صديق كويس اكتر منه

المهم انا روحت خلصانه نمت نوم عميق جدا وصحيت للشغل متأخرة جدا ونزلت لقيت الشوارع زحمة جدا الي جانب انها خدت صفة جديدة وهي ان الدنيا مزحلقة